Yaponiyada həddindən artıq istilər üçün yeni İxtira: İnsan soyuducusu

Yaponiyada istifadəçilərini 10 dəqiqə ərzində tamamilə soyutmağı vəd edən “şəxsi soyutma kabini” adlı yeni bir məhsul satışa çıxarılıb. İstehsalçıları cihazın kondisionerlərdən və ya ventilyatorlardan daha təsirli olduğunu iddia edirlər.
Elchi.az xəbər verir ki, şəxsi soyutma kabini 2,1 metr hündürlükdədir və paslanmayan poladdan hazırlanıb.
“Do Hiemon” adlanan fərdi soyutma kabini həddindən artıq istiliyə məruz qalan insanların bədən istiliyini sürətlə aşağı salmaq üçün nəzərdə tutulub.
Kabinənin daxili temperaturu 15 dərəcə Selsiyə endirilir, 5 dərəcə Selsi soyuq hava isə istifadəçinin başına, boynuna, çiyinlərinə və arxasına püskürdülür.
İstehsalçılar bildirirlər ki, bu metod istilik vurması və istidən qaynaqlanan yorğunluq simptomlarını standart kondisioner və ya ventilyatordan daha tez aradan qaldırır.
Dünya miqyasında istilik dalğaları və rekord qıran temperatur yeni soyutma həllərini ön plana çıxarır.
Yaponiyada termometrlərin 40 dərəcədən yuxarı temperatur göstərdiyi “həddindən artıq isti” günlərin başlaması bu cür texnologiyaların inkişafına təsir göstərib. Təxminən 1,5 milyon yen satış qiyməti olan cihazın saatlıq istismar xərcinin çox aşağı olduğu deyilir. Fərdi istifadə əvəzinə, onun əsas tətbiq sahələri fabriklər, anbarlar və ya yüksək temperaturda fəaliyyət göstərən ictimai yerlər kimi təcili soyutmaya ehtiyac duyulan yerlər kimi göstərilib.

Şayəstə