Qırğızıstan və Tacikistan sərhəddə çay sahillərinin möhkəmləndirilməsini müzakirə edib
Qırğızıstan və Tacikistan nümayəndələri Batken bölgəsinin sərhəd ərazilərində çay sahillərinin möhkəmləndirilməsi ilə bağlı işçi görüş keçiriblər.
Elchi.az xəbər verir ki, görüş Qırğızıstan tərəfinin təşəbbüsü ilə Tangi və Daçi sərhəd ərazilərində baş tutub.
Tərəflər Ak-Su çayının hər iki sahilini möhkəmləndirmək üçün Tacikistan tərəfinin Daçi ərazisində neytral yolun tikintisi zamanı əldə edilmiş torpaq və çınqıl daşdan istifadə imkanlarını müzakirə ediblər. İşlərin Daçi ərazisindən “Qolovnoy” suqəbuledicisinə qədər olan hissəni əhatə etməsi planlaşdırılır.
Tərəflər Qapçıqay-Tangi hissəsində çay sahilinin möhkəmləndirilməsi barədə razılığa gəliblər. Suyun səviyyəsinin yüksəlməsi sahil eroziyası və çay yatağının dəyişməsi riski yaradır. Hazırda müvafiq hissədə texnikalar işləyir.
Batken Rayon Su İdarəsinin rəhbəri Tacikistan tərəfini sahil mühafizəsi işlərini sürətləndirməyə çağırıb.
