Dünyanın ən bahalı valyutasına sahib ölkədən YENİ QƏRAR
Küveytdə vətəndaşlığını itirmiş bəzi şəxslərin ölkədə qanuni əsaslarla qalmasına şərait yaradılıb.
Musavat.com xəbər verir ki, yeni tətbiq müəyyən kateqoriyalara daxil olan şəxslərə 10 ilədək yaşayış icazəsi almaq imkanı verir.
Tənzimləmə Baş nazirin müavini, daxili işlər naziri Şeyx Fəhad Yusif Səud əl-Sabahın qərarı ilə qüvvəyə minib. Qərar 1959-cu il Vətəndaşlıq Qanununun müvafiq maddələri əsasında vətəndaşlıqdan çıxarılan bəzi şəxslərə şamil olunur.
Yeni qaydadan həmin şəxslər vasitəsilə vətəndaşlıq əldə etmiş və vətəndaşlıqdan çıxarılma qərarına daxil edilmiş himayəsində olan şəxslər də yararlana biləcəklər.
Yeni tənzimləmə vətəndaşlığın geri qaytarılması anlamına gəlmir. Şəxslərə yalnız Küveytdə xarici vətəndaş statusunda qanuni şəkildə yaşamaq üçün ayrıca hüquqi status verilir.
Bu statusdan yararlanmaq istəyən şəxslərin əvvəlki vətəndaşlıqlarını geri qazanmaları və ya başqa ölkənin vətəndaşlığını əldə etmələri tələb olunur.
Küveytdə xarici vətəndaşların ölkə xaricində qala biləcəyi müddətlə bağlı qaydalara da dəyişiklik edilib. Ümumi qaydaya əsasən, xaricdə qalma müddəti 6 ayla məhdudlaşdırılır.
Lakin yeni statusa daxil olan şəxslər, bəzi xarici vətəndaş uşaqları, ölkədə əmlaka sahib olan şəxslər və müəyyən şərtlərə cavab verən investorlar üçün istisnalar nəzərdə tutulub.
Ev işçiləri üçün isə daha sərt qaydalar tətbiq olunacaq. Onların Küveytdən kənarda maksimum 4 ay qalmasına icazə veriləcək. Müvafiq icazə olmadan bu müddətin aşılması yaşayış icazəsinin itirilməsi ilə nəticələnə bilər.
