“Yabloko” Putinin partiyasında 800 milyonluq xarici iz tapdı
Rusiyanın “Yabloko” partiyası parlamentdə təmsil olunan siyasi qüvvələrin maliyyələşdirilməsi ilə bağlı araşdırma apararaq onların donorlarında 1 milyard rubldan çox xarici maliyyə əlaqəsinin izlərini aşkarladığını bildirib.
Musavat.com xəbər verir ki, “Yabloko”nun Antikorrupsiya Siyasəti Mərkəzinin araşdırmasına partiyanın özünün Dövlət Duması seçkilərindən kənarlaşdırılması səbəb olub.
Federal siyahının qeydiyyatının ləğvinə əsaslardan biri xaricdən pul aldığı iddia edilən şəxslərin partiyaya cəmi 16 900 rubl ianə verməsi göstərilmişdi.
“Yabloko” eyni meyarları parlament partiyalarının donorlarına tətbiq etdiyini bildirir. Araşdırma zamanı həmin şirkət və şəxslərin ixrac əməliyyatları, xarici sifarişçiləri, beynəlxalq müqavilələri və xarici korporativ əlaqələri araşdırılıb.
Partiyanın hesablamasına görə, bu cür donorlarla əlaqəli mənbələrdən beş parlament partiyasına ən azı 1,15 milyard rubl daxil olub. Ən böyük məbləğ hakim “Vahid Rusiya”nın payına düşür – 811,75 milyon rubl.
“Yabloko” bildirir ki, “Vahid Rusiya” donorlarının əlaqələri 51 xarici yurisdiksiyanı əhatə edir. Bunlardan 22-si Rusiya hakimiyyətinin özünün “dost olmayan ölkələr” siyahısına daxil etdiyi dövlətlərdir.
Araşdırmada daha bir diqqətçəkən iddia irəli sürülür: “Yabloko” “Vahid Rusiya”nın bəzi sponsorlarının 2021-ci ilin dekabrında Ukraynaya məhsul tədarük etdiyini müəyyənləşdirdiyini bildirir. Lakin bu epizodla bağlı ətraflı məlumat açıqlanmayıb.
Beləliklə, “Yabloko” özünün seçkidən çıxarılmasına tətbiq olunan maliyyələşdirmə meyarlarının digər partiyalara da eyni şəkildə şamil edilməsini tələb edir. Partiyanın mövqeyi mahiyyət etibarilə belədir: əgər 16 900 rubl “xarici iz” seçkidən kənarlaşdırılmaq üçün əsasdırsa, eyni meyar milyardlarla rubl alan digər siyasi qüvvələrə də tətbiq edilməlidir.
