Venesuelada yeni zəlzələlər: 400-dən çox afterşok qeydə alınıb
Dağıdıcı zəlzələnin nəticələrinin aradan qaldırılması işlərinin davam etdiyi Venesuelada yeni yeraltı təkanlar qeydə alınıb.
Elchi.az xəbər verir ki, ölkə rəsmilərinin “Democrata” nəşrinə verdiyi məlumata görə, bazar ertəsi 4,2 maqnitudalı yeni seysmik təkan qeydə alınıb. Zəlzələnin episentri ölkənin şimalındakı La-Quayra ştatından 10 kilometr şərqdə yerləşib.
Venesuela Seysmoloji Araşdırmalar Fondunun (Funvisis) məlumatına görə, bundan qısa müddət sonra La-Quayra rayonunda 2,7 maqnitudalı ikinci zəlzələ baş verib.
Qurumun məlumatına əsasən, son yeraltı təkanların ocaqları müvafiq olaraq 2,9 və 5 kilometr dərinlikdə yerləşib. Bu seysmik hadisələrdən əvvəl də bir neçə daha zəif təkan qeydə alınıb.
La-Quayra regionu 24 iyunda baş verən güclü zəlzələdən sonra ən çox zərər çəkmiş bölgə olaraq qalır. Səlahiyyətli orqanların məlumatına görə, əsas zərbədən bəri artıq 400-dən çox afterşok qeydə alınıb.
Yeraltı təkanlar həm hərbi vəziyyətin elan olunduğu La-Quayrada, həm də ölkənin paytaxtı Karakasda hiss olunub.
Hakimiyyət orqanları sakinləri diqqətli olmağa, yeni yeraltı təkanlar barədə məlumat verməyə və zərər çəkmiş rayonlarda xilasetmə xidmətlərinin işini çətinləşdirməmək üçün imkan daxilində mərkəzi sahilboyu ərazilərə səfərlərdən çəkinməyə çağırıb.
Qeyd edək ki, Venesuelada 24 iyunda baş verən zəlzələ nəticəsində azı 774 bina zədələnib və ya tamamilə dağılıb. Həlak olanların sayı isə 1450 nəfərə yüksəlib.
Məryəm
